जिल्हा जळगाव भुसावल प्रा. डॉ. डी. एम. ललवाणी यांचा कर्मभूमीत विशेष सन्मान सामाजिक शैक्षणिक व पर्यटन क्षेत्रातील उल्लेखनीय योगदानाची दखल; मान्यवरांच्या उपस्थितीत सन्मानचिन्ह प्रदान

भुसावळ : येथील ब्रेकिंग महाराष्ट्र डिजिटल न्यूज चॅनलने डिजिटल माध्यम क्षेत्रात आपली वेगळी ओळख निर्माण केल्यानंतर आता ‘भुसावळ जंक्शन’ या नवीन साप्ताहिकाच्या माध्यमातून प्रिंट मीडिया क्षेत्रात पदार्पण केले आहे. या साप्ताहिकाच्या प्रकाशन समारंभात भुसावळ येथील कोटेचा महिला महाविद्यालयाचे माजी प्रभारी प्राचार्य, गोसेवक, सामाजिक कार्यकर्ते तथा पर्यटन क्षेत्रातही उल्लेखनीय कार्य करणारे प्रा. डॉ. डी. एम. ललवाणी यांचा त्यांच्या कर्मभूमीत विशेष सन्मान करण्यात आला.प्रा. डॉ. ललवाणी यांनी शैक्षणिक क्षेत्रात प्रदीर्घ काळ कार्य करताना विद्यार्थिनींच्या सर्वांगीण विकासासाठी योगदान दिले. निवृत्तीनंतरही त्यांनी सामाजिक बांधिलकी जपत आपले कार्य अविरत सुरू ठेवले आहे. ‘निसर्गाकडे चला’ हा संकल्प घेऊन त्यांनी ॲग्रो टुरिझम व रेस्टॉरंटच्या माध्यमातून पर्यटन क्षेत्रातही आपला ठसा उमटविला आहे. निसर्गप्रेमींना ग्रामीण जीवन, निसर्ग आणि पर्यावरणाशी जोडण्याचा त्यांचा प्रयत्न विशेष उल्लेखनीय आहे.याशिवाय अनेक महाविद्यालयांना पुस्तके भेट देणे, विविध सामाजिक व शैक्षणिक संस्थांना मदतीच्या माध्यमातून सहकार्य करणे आणि दानशूर व्यक्ती म्हणून समाजोपयोगी उपक्रमांना हातभार लावणे, अशा विविध माध्यमांतून त्यांनी सामाजिक बांधिलकी जपली आहे. निगर्वी स्वभाव, संघर्षमय जीवनप्रवास आणि अनेक संकटांवर मात करून समाजसेवेचा घेतलेला वसा यामुळे त्यांचे व्यक्तिमत्त्व प्रेरणादायी असल्याचे मत यावेळी व्यक्त करण्यात आले.कार्यक्रमात प्रा. डॉ. नरेंद्र महाले यांनी प्रा. डॉ. ललवाणी यांच्या कार्याचा गौरवपूर्ण उल्लेख करत त्यांच्या जीवनप्रवासावर प्रकाश टाकला. शिक्षण, गोसेवा, सामाजिक कार्य, दानशूर वृत्ती आणि पर्यटन क्षेत्रातील त्यांचे योगदान समाजासाठी प्रेरणादायी असल्याचे व ते महाराष्ट्रातील ऐकटेच प्राध्यापक आहेत की त्यांनी जीतकी वर्ष सेवा केली तेवढ्या म्हणजे 32 विद्यार्थीनीची माहीती आपल्या घरट्यातुन आकाशाकडे या पुस्तकातुन दिली असे त्यांनी नमूद केले.यावेळी महाराष्ट्राचे वस्त्रोद्योग मंत्री नामदार संजय सावकारे, भुसावळचे पोलीस उपअधीक्षक केदार बारबोले, यावलच्या नगराध्यक्षा छाया पाटील, राष्ट्रवादी काँग्रेस (अजित पवार गट)चे जिल्हाध्यक्ष उमेश नेमाडे, प्रतिष्ठा महिला मंडळाच्या अध्यक्षा सौ. रजनी सावकारे, यावलचे नगरसेवक अतुल पाटील, भुसावळचे शिक्षण सभापती राजेंद्र आवटे, परीक्षेत बर्‍हाटे, पुरुषोत्तम नारखेडे तसेच बालभारतीच्या मराठी भाषा अभ्यास मंडळाचे सदस्य डॉ. जगदीश पाटील आदी मान्यवर उपस्थित होते. मान्यवरांच्या हस्ते प्रा. डॉ. ललवाणी यांना विशेष सन्मानचिन्ह प्रदान करून गौरविण्यात आले.निवृत्त शिक्षक प्रमोद आठवले यांनीही आपल्या मनोगतातून प्रा. डॉ. ललवाणी यांच्या कार्याचा आवर्जून उल्लेख केला. त्यांच्या कार्यातील सातत्य, सामाजिक जाणिव आणि समाजासाठी काहीतरी देण्याची वृत्ती यांचे त्यांनी कौतुक केले.सन्मानाला उत्तर देताना प्रा. डॉ. डी. एम. ललवाणी यांनी ‘भुसावळ जंक्शन’ या साप्ताहिकाच्या पुढील वाटचालीस शुभेच्छा दिल्या. डिजिटल माध्यमाने आज व्यापलेले व्यापक क्षेत्र, बदलते माध्यमविश्व आणि प्रिंट मीडियामध्ये साप्ताहिकाच्या माध्यमातून प्रवेश करण्याचे महत्त्व याविषयी त्यांनी मनोगत व्यक्त केले तसेच साप्ताहिकाचे संपादक गणेश वाघ यांच्या अथक परिश्रमांचे कौतुक केले.आजपर्यंत अनेक संस्था आणि संघटनांनी माझा गौरव केला आहे; मात्र ज्या भुसावळ शहराला मी माझी कर्मभूमी मानतो त्याच कर्मभूमीत माध्यम क्षेत्राच्या वतीने झालेला हा सन्मान माझ्यासाठी विशेष आनंदाचा आणि समाधानाचा आहे अशा भावना प्रा. डॉ. ललवाणी यांनी व्यक्त करत आयोजक व उपस्थित मान्यवरांचे आभार मानले.प्रा. डॉ. डी. एम. ललवाणी यांच्या या विशेष सन्मानाबद्दल त्यांचे हितचिंतक, मित्रपरिवार, आप्तस्वकीय व नातलगांकडून अभिनंदनाचा वर्षाव होत आहे. त्यांच्या विविध क्षेत्रांतील कार्याची दखल घेत कर्मभूमीत झालेला हा सन्मान त्यांच्या सामाजिक व शैक्षणिक योगदानाला मिळालेली कौतुकाची पावती ठरली आहे.