गणेश विसर्जनासाठी प्रशासन सज्ज ; भुसावळात विसर्जन मार्ग व तापी घाटांची पाहणी एसडीएम, तहसीलदार, एसडीपीओंसह विविध विभागांचा संयुक्त पाहणी दौरा; सुरक्षिततेच्या उपाययोजनांना वेग

भुसावळ प्रतिनिधी : गोपी अण्णा
आगामी गणेशोत्सव व गणपती विसर्जन मिरवणूक शांततेत, सुरक्षित आणि सुरळीत पार पडावी यासाठी भुसावळ प्रशासनाने तयारीला वेग दिला आहे. याच पार्श्वभूमीवर उपविभागीय अधिकारी (एसडीएम), तहसीलदार आणि उपविभागीय पोलीस अधिकारी (एसडीपीओ) यांच्या नेतृत्वाखाली शहरातील प्रमुख विसर्जन मिरवणूक मार्ग तसेच तापी नदीकाठावरील विसर्जन घाटांची संयुक्त पाहणी करण्यात आली.या पाहणी दौऱ्यात नगरपरिषद, महावितरण, अग्निशामक दल, वृक्ष छाटणी विभाग, वाहतूक शाखा तसेच बाजारपेठ आणि शहर पोलीस ठाण्यांचे प्रभारी अधिकारी सहभागी झाले.गणेश विसर्जनाच्या दिवशी होणारी गर्दी, मिरवणुकीची सुरक्षितता आणि संभाव्य आपत्कालीन परिस्थिती लक्षात घेऊन विविध उपाययोजनांचा आढावा घेण्यात आला.तापी घाटांवर विशेष लक्ष – –
तापी नदीवरील विसर्जन घाटांची सद्यस्थिती, घाटाकडे जाणारे रस्ते, बॅरिकेटिंग, प्रकाश व्यवस्था तसेच रात्रीच्या विसर्जनाच्या पार्श्वभूमीवर आवश्यक दिवे व रोषणाई यांची पाहणी करण्यात आली विसर्जनावेळी कोणतीही अनुचित घटना घडू नये यासाठी सुरक्षेच्या उपाययोजनांवर विशेष भर देण्यात आला.धोकादायक फांद्या, खड्डे आणि विद्युत वाहिन्यांची तपासणी – -विसर्जन मिरवणूक मार्गावरील धोकादायक फांद्या छाटणे, रस्त्यांवरील खड्डे बुजविणे तसेच विद्युत वाहिन्यांमुळे संभाव्य धोका निर्माण होणार नाही, याची दक्षता घेण्याच्या सूचना संबंधित विभागांना देण्यात आल्या. मिरवणूक मार्ग सुरक्षित आणि अडथळेमुक्त ठेवण्यावर प्रशासनाने भर दिला आहे.आपत्कालीन यंत्रणा सज्ज ठेवण्याचे निर्देश -तापी नदीकाठावरील विसर्जनाच्या पार्श्वभूमीवर अग्निशामक दल, आपत्ती व्यवस्थापन पथक तसेच प्रशिक्षित व कुशल पोहणाऱ्या जवानांची नियुक्ती करण्याबाबत नियोजन करण्यात आले. कोणतीही आपत्कालीन परिस्थिती उद्भवल्यास तातडीने मदत मिळावी, यासाठी यंत्रणा सज्ज ठेवण्याच्या सूचना देण्यात आल्या.वाहतूक नियंत्रणासाठी विशेष नियोजन – -गणेश विसर्जन मिरवणुकीदरम्यान शहरातील वाहतूक व्यवस्था सुरळीत राहावी यासाठी वाहतूक मार्गात आवश्यक बदल, जड वाहनांवर निर्बंध आणि गर्दीच्या ठिकाणी बॅरिकेटिंग करण्या बाबतही नियोजन करण्यात आले. मिरवणूक मार्गावर अनावश्यक अडथळे निर्माण होणार नाहीत, याची दक्षता घेण्याचे निर्देश देण्यात आले.सर्व संबंधित विभागांनी आवश्यक दुरुस्तीची कामे आणि सुरक्षा उपाययोजना तातडीने पूर्ण करण्याचे निर्देश प्रशासनाकडून देण्यात आले आहेत. गणेशोत्सव शांततेत आणि आनंददायी वातावरणात पार पाडण्यासाठी नागरिकांनी तसेच गणेश मंडळांनी पोलीस व प्रशासनाला सहकार्य करावे, असे आवाहन उपविभागीय पोलीस अधिकारी कार्यालय, भुसावळ यांच्या वतीने करण्यात आले आहे.